Presidenti amerikan, Donald Trump e ka paralajmëruar Iranin se “koha po mbaron” për të negociuar një marrëveshje mbi programin e tij bërthamor, pas shtimit të vazhdueshëm të forcave ushtarake amerikane në Gjirin Persik.
Presidenti amerikan tha se një “Armadë masive” po “lëvizte shpejt, me fuqi, entuziazëm dhe qëllim të madh” drejt Iranit, duke iu referuar një force të madhe detare amerikane, raporton BBC.
Në përgjigje, misioni i Iranit në OKB tha se Teherani “është i gatshëm për dialog bazuar në respekt dhe interesa të ndërsjella”, por nëse shtyhet, do të mbrohet dhe “do të përgjigjet si kurrë më parë”.
Irani këmbëngul se programi i tij bërthamor është tërësisht paqësor dhe ka mohuar vazhdimisht akuzat e SHBA-së dhe aleatëve të saj se po përpiqet të zhvillojë armë bërthamore.
Komentet e fundit të Trump mbi Iranin duket se përqendrohen më shumë në programin bërthamor të vendit.
“Shpresojmë që Irani shpejt do të ‘ulet në tryezë’ dhe do të negociojë një marrëveshje të drejtë dhe të barabartë – JO ARMË BËRTHAMORE”, shkroi ai në Truth Social.
Ai tha se forca detare në Gjirin Persik ishte më e madhe se ajo që ai dërgoi në Venezuelë përpara se forcat amerikane të kapnin ish-udhëheqësin e vendit, Nicolas Maduro.
Trump shtoi se kjo forcë ishte “e gatshme, e vullnetshme dhe e aftë të përmbushte me shpejtësi misionin e saj, me shpejtësi dhe dhunë, nëse është e nevojshme”.
Duke iu referuar sulmeve të SHBA-së në centralet bërthamore iraniane qershorin e kaluar , të cilat u nisën gjatë luftës 12-ditore të Iranit me Izraelin, presidenti amerikan paralajmëroi: “Sulmi i ardhshëm do të jetë shumë më i keq! Mos e bëni këtë të ndodhë përsëri.”
Përpara se të bëheshin këto komente, Ministri i Jashtëm iranian Abbas Araghchi tha: “Zhvillimi i diplomacisë përmes kërcënimeve ushtarake nuk mund të jetë efektiv ose i dobishëm”.
