Irani e ka dënuar ashpër sulmin dhe ndërhyrjen amerikane nw territorin e tij, duke e cilësuar si një “kalim të rrezikshëm të vijës së kuqe”.
Ali Akbar Velayati, një nga këshilltarët kryesorë të liderit suprem të Iranit, paralajmëroi se çdo vend që lejon SHBA-të të përdorin territorin e tij për sulme ndaj Iranit do të konsiderohet një objektiv i ligjshëm ushtarak.
Ndërkohë, Presidenti i SHBA-së, Donald Trump, nuk përjashtoi mundësinë e një përshkallëzimi të mëtejshëm, raporton AP.
Në një deklaratë të fortë, ai tha se nëse Irani hakmerret ndaj forcave amerikane, “sulmet do të vazhdojnë” dhe për herë të parë përmendi publikisht mundësinë e një ndryshimi regjimi në Teheran, një lëvizje që do të shënonte një kthesë të madhe në politikën amerikane ndaj Iranit.
Kjo bie ndesh me deklaratat e mëparshme të administratës së tij, e cila kishte shprehur gatishmëri për dialog diplomatik me Iranin.
Sekretari i Shtetit, Marco Rubio, në një intervistë për CBS, përsëriti thirrjen për diplomaci duke thënë: “Le të takohemi drejtpërdrejt.”
Por në terren, tensioni vazhdon të rritet, me dhjetëra mijëra trupa amerikane të dislokuara në bazat ushtarake në Lindjen e Mesme, në pritje të zhvillimeve të mëtejshme.
