Dy javë më parë, presidenti Donald Trump deklaroi se Rusia dhe Ukraina do të kishin vetëm 50 ditë për të arritur një marrëveshje që do t’i jepte fund luftës mes dy vendeve. Por tani, Trump ka njoftuar se do ta shkurtrojë këtë afat në një “numër më të vogël” ditësh.
Në një intervistë të fundit, Trump shprehu skepticizmin e tij lidhur me gatishmërinë e presidentit rus, Vladimir Putin për të arritur një marrëveshje paqeje. “Mendoj se e di tashmë përgjigjen, çfarë do të ndodhë,” tha ai, duke aluduar se lufta mund të vazhdojë për një kohë të gjatë.
Gjithashtu, Trump përsëriti kritikat e tij ndaj Putinit, duke e akuzuar se vetëm flet për përfundimin e luftës, ndërsa vazhdon bombardimet në Ukrainë. “Kjo nuk është mënyra për ta bërë këtë,” tha Trump, dhe shtoi se është “i zhgënjyer nga Presidenti Putin.”
Presidentit amerikan iu kërkua të sqaronte deklaratën e tij të mëparshme, ku kishte caktuar një afat prej 50 ditësh për arritjen e paqes. Ai u përgjigj se nuk sheh “asnjë arsye për të pritur më gjatë”. “Thjesht nuk shohim ndonjë përparim të bërë,” tha ai.
Trump tha se do t’i jap Rusisë vetëm 10 deri në 12 ditë për të vendosur paqe, ka shkruar Associated Press.
Kjo deklaratë e fundit e Trump vjen në një kohë kur tensionet midis Rusisë dhe Ukrainës vazhdojnë të jenë të larta, dhe shpresat për një marrëveshje paqësore duket se po zbehen./teve1/
