Presidenti i SHBA-së, Donald Trump, cilësoi të martën një takim shumëpalësh si “shumë të suksesshëm” që e zhvilloi mbi Gazën me udhëheqës të zgjedhur të vendeve me shumicë myslimane.
“Patëm një takim shumë të mirë në lidhje me Gazën”, u tha Trump gazetarëve ndërsa po largohej nga eventi. “Ishte një takim shumë i suksesshëm me të gjithë aktorët e mëdhenj, përveç Izraelit, por kjo do të jetë e radhës, dhe mendoj se mund të gjejmë një zgjidhje për Gazën, por ishte një takim shumë i mirë me udhëheqës të shkëlqyer.”
Zyrtarët nuk dhanë më shumë informacion mbi rezultatin e takimit me dyer të mbyllura.
Shtëpia e Bardhë tha më parë se Turqia, Katari, Arabia Saudite, Indonezia, Pakistani, Egjipti, Emiratet e Bashkuara Arabe dhe Jordania do të përfaqësoheshin në takimin në nivel udhëheqësish, por nuk ofroi detaje shtesë./Anadolu
