Presidenti amerikan, Donald Trump, është ankuar pse nuk ka marrë një çmim Nobel për Paqe, për punën e tij në arritjen e marrëveshjes së Washingtonit për normalizim ekonomik Kosovë-Serbi gjatë mandatit të tij të parë si president.
Trumpi u pyet për një propozim që ai meriton çmimin Nobel nëse arrin t’i japë fund luftimeve Iran-Izrael.
“Epo, është dashur të më jepnin Nobelin për Ruanda-Kongo ose mund të thoni Serbia dhe Kosova… mund të thoni për shumë. E madhja është Indi-Pakistan… por nuk më japin sepse atë ua japin vetëm liberalëve”, ka thënë ai, të premten para gazetarëve.
Kjo nuk është hera e parë që Trump e përmend marrëveshjen Kosovë-Serbi si arritje të madhe të administratës së tij. Ai ka pohuar edhe më parë se gjatë mandatit të tij “Kosova dhe Serbia ishin një hap larg luftës”.
Marrëveshja e Washingtonit përqendrohej kryesisht në çështje ekonomike, përfshirë bashkëpunimin në energji dhe infrastrukturë, ndërsa parashihte edhe një moratorium të përkohshëm mbi veprimet diplomatike si anëtarësimi në organizata ndërkombëtare nga Kosova dhe fushata e tërheqjeve të njohjeve nga Serbia.
Trump vazhdon ta konsiderojë këtë marrëveshje si një sukses personal në politikën e jashtme, edhe pse komuniteti ndërkombëtar dhe institucionet relevante kanë pasur qëndrime të ndryshme për efektet e saj afatgjata.
