Kjo shtëpi në Restelicë, mesnatën e së mërkurës u shndërrua në skenë krimi.
Brenda saj, dyshohet se i biri e provoi nga jeta nënën e tij.
E deri të ngjarja tragjike që tronditi Dragashin, dyshohet se erdhi pas dhunës fizike që Ferzidin Boza ushtroi mbi nënën e tij.
Viktima në këtë rast është Tenzile Boza, rreth 60 vjeçare.
Ferzidin Bozën, fqinjët e përshkruajnë si person me probleme mendore.
“Familja e urtë djali ka pas probleme mendore. Jo askujt nuk i ka bërë asgjë, vetëm kjo tragjedi na ka çuditur të gjithë, ka qenë e vështirë kur e kemi marr vesh, për dite kanë ardhur çdo mëngjes, çdo mbrëmje kanë ardhur… Ai u kanë me probleme mendore ne e kemi kuptuar të gjithë”, ka thënë një fqinjë.
Banorët e kësaj lagje, thonë se ka disa ditë, që nuk e kanë parë viktimën.
Ndërsa vdekja e saj, u konstatua në vendin e ngjarjes nga ekipet mjekësore.
“Ne në QKMF në Dragash në ora 01:30 minuta kemi marrë një telefonatë nga Policia e Kosovës për një vdekje të dyshimtë në fshatin Restelicë të Dragashit. Pas kësaj telefonate QKMF ka dërguar një ekip mjekësorë ku mjeku ka konstatuar vdekjen e viktimës në vendin e ngjarjes, e pastaj policia ka vazhduar më tutje me procedurat tjera ligjore”, u shpreh Velia.
Por, personi që dyshohet se e provoi nga jeta nënën e tij, po del të jetë i njohur për organet e rendit.
Të paktën kështu kanë deklaruar të mërkurën në Prokurorinë Themelore të Prizrenit.
“Nga të dhënat zyrtarë të Prokurorisë rezulton se i njëjti ka pasur çrregullime mendore si dhe ka qenë më herët i përfshirë në tri raste penale të dhunës në familje. Dy raste i ka pasur në vitin 2021 ndërkaq një rast e ka pasur në vitin 2024 këto raste janë hetuar nga prokuroria, për këto raste prokuroria ka ngritur aktakuzë po ashtu për të njëjta raste janë nxjerr edhe aktvendime gjykuese nga ana e gjykatës”, ka thënë Mehmeti.
Tëvë1 ka siguruar edhe aktgjykimet e Gjykatës Themelore të Prizrenit ndaj Ferzidin Bozës.
Në to, figuron se Boza ka qenë i dënuar në tri raste të dhunës në familje.
Ndërsa po ashtu, me urdhër të gjykatës ishte shqiptuar edhe masa e trajtimit të detyrueshëm psikiatrik në liri.
“Masa e shqiptuar do të ekzekutohet nga personeli mjekësor i Qendrës së Shëndetit Mendor në Prizren, në kohëzgjatje deri në përmirësimin e gjendjes mendore të tij dhe do të fillojë të zbatohet menjëherë pas pranimit të vendimit. Masa e shqiptuar do të ekzekutohet në QSHM-Prizren, e cila obligohet që të pranojë të pandehurin dhe të njëjtin ta trajtoj sipas protokolleve të saj dhe të njoftoj gjykatën çdo 6 /tre/ muaj për gjendjen shëndetësore të tij”. Thuhet në njoftimin e Gjykatës themelore në Prizren.
I dyshuari për këtë rast, është arrestuar nga Policia e Kosovës.
