Serbia vazhdon ta mohoj të kaluarën duke mos pranuar përgjegjësi për krimet që janë kryer gjatë viteve të 90-ta.
Ligjëruesja në Universitetin e Amsterdamit, Nevenka Tromp, thotë se që nga koha e Millosheviqit nuk ka ndryshuar mentaliteti politik në Serbi.
Ajo thotë se presidenti aktual serb, Aleksandar Vuçiq e di shumë mirë për krimet që janë kryer në Kosovë sepse gjatë periudhës 1998-2000 ai mbante postin e Ministrit të Informacionit.
“Politika shtetërore e Serbisë dhe politika e udhëheqjes së saj kur përballet me të kaluarën, nuk ka të bëjë vetëm me gjërat që i kanë ndodhur Kosovës nga politikanët serbë, të cilët kanë dhënë urdhra që forcat e sigurisë serbe të kryejnë mizori në për të arritur qëllimin e saj për shtrirjen e kufijve të Serbisë. Që nga koha e Millosheviqit nuk ka pasur asnjë ndryshim në mentalitetin e politikanëve serbë. Mos harroni se presidenti aktual Aleksandër Vuçiq ka qenë Ministër i Informacionit gjatë luftës së Kosovës. Pra, ai po e bënte karrierën e tij si politikan duke shitur gjysmën e së vërtetës në publik për t’i mbuluar motivet e politikës serbe në vitet e 90-ta. Slogani politik i Millosheviqit ishte ta bënte Serbinë sërish të madhe. Dhe çfarë shohim tani, pas tre dekadash, se Serbia nuk është as një centimetër më e madhe se sa ishte. Dhe në një farë mënyre, nuk është vetëm një mësim për rajonin, por është ndoshta mësim për të gjithë botën që këto lloj ideologjish thjesht krijojnë kaos, dhe absolutisht nuk sjellin stabilitet e prosperitet”, thotë ajo.
Kryeministri i vendit, Albin Kurti, ka bërë të ditur se po përgatiten që Serbia të akuzohet për krimet e kryera gjatë luftës në Kosovë.
Megjithatë Nevenka Tromp, thotë se kjo nuk është një çështje e thjeshtë meqë Kosova nuk është anëtare e Kombeve të Bashkuara.
“Nuk është një rrugë e lehtë për ta paditur Serbinë për krimet e kryera. Kosova si shtet nuk është pjesë e Kombeve të Bashkuara, megjithatë në vitin 2019, Gambia ka ngritur një padi në GJND në emër të popullit Rohingya të Mianmarit dhe tani së fundmi Afrika e Jugut ka paraqitur një padi për gjenocid në GJND në emër të palestinezëve që janë gjithashtu shtet de facto. Sistemi i OKB-së tregon thjesht se Kosova si shtet de facto mund të gjejë një shtet të tretë anëtar të OKB-së dhe të ngrejë padi për gjenocid kundër Serbisë”, shprehet Tromp
Sipas Fondit për të Drejtën Humanitare, në luftën e fundit në Kosovë janë vrarë rreth 13,500 persona, ndërsa mbi 1.600 të tjerë mbesin akoma të zhdukur.
