Vendosen buqeta lulesh.
E disa mbanin veshur bluza me mbishkrimin “Në luftë kundër krimit”.
Kështu këtë të shtunë u bënë homazhe te pllaka përkujtimore e zyrtarit policor Triumf Riza në “Dardani” të Prishtinës, në 18-vjetorin e vrasjes së tij.
Më pas, u vu edhe gurthemeli për memorialin kushtuar policëve të rënë në krye të detyrës.
Pjesë e kësaj ceremonie ishin përfaqësues të institucioneve të larta të vendit, familjarë e qytetarë.
Kryeministri në detyrë i Kosovës, Albin Kurti, tha se Riza është hero i vendit.
“…Unë kam banuar për 9 vite në këtë lagje dhe e kam njohur personalisht Triumf Rizën. Ka qenë djalë fenomenal i kryeqytetit që ka dashur drejtësinë dhe nuk e ka kursyer veten në asnjë çast për drejtësi. Edhe në të gjallë ka qenë shembull për të gjithë, e tash si hero i Kosovës, si dikush që sakrifikoi kundër bandave kriminale, është bërë inspirim për secilin zyrtar shteti e jo vetëm për Policinë e Kosovës”, deklaroi Kurti.
E ministri në detyrë i Punëve të Brendshme, Xhelal Sveçla, deklaroi se Triumf Riza është simbol i luftës ndaj krimit në kryeqytet, ndërkaq shtoi se janë duke punuar për zbardhjen e rastit.
“Në qoftë se Afrim Bunjaku e Enver Zymberi janë simbol të mbrojtjes së integritetit territorial dhe shtrirjes së sovranitetit të Kosovës në veri, Triumf Riza është simbol i luftës ndaj krimit e shtrirjes së ligjshmërisë në kryeqytet. Duke respektuar sakrificën e tij, ne respektojmë të gjithë ata që punojnë për rend e ligj, të cilët punojnë për forcimin e shtetit të Kosovës, e të cilët punojnë për një të ardhme më të mirë për gjeneratat e ardhshme të Kosovës”, deklaroi Sveçla.
Pjesë e ceremonisë ishte edhe Drejtori i Përgjithshëm i Policisë së Kosovës, Gazmend Hoxha.
Ai u shpreh se Riza ishte oficer shembullor i policisë.
“Triumfi ka qenë një oficer shembullor i Policisë së Kosovës, një oficer i veçantë i njësive tona speciale, ka dhënë një kontribut të jashtëzakonshëm në ngritjen e kapaciteteve dhe ngritjen profesionale të njësive tona. Fatkeqësisht dora gjakatare e krimit e mori shumë herët dhe e pengoi në rrugën e rritjes dhe kontributin e tij në Policinë e Kosovës”, tha Hoxha.
E babai i Triumf Rizës, Shefqet Riza falënderoi kryeministrin Kurti për siç tha, përkrahjen për zbardhjen e rastit të djalit të tij.
Për ta përkujtuar në 18-vjetorin e vrasjes, prezent ishin edhe kolegët e Triumf Rizës nga Policia e Kosovës.
