Operatori i Sistemit, Transmisionit dhe Tregut të energjisë elektrike (KOSTT) ka bërë të ditur se ka emëruar Trim Tërnavën në pozitën e kryeshefit ekzekutiv të ndërmarrjes.
Vendimi është marrë në mbledhjen e Bordit të Drejtorëve të mbajtur më 19 janar 2026, ndërsa Tërnava do ta marrë zyrtarisht detyrën më 16 shkurt.
Sipas njoftimit të KOSTT-it, emërimi është rezultat i një procesi të hapur dhe konkurrues, të zhvilluar në përputhje me Ligjin për Ndërmarrjet Publike, dhe është miratuar njëzëri nga bordi.
Trim Tërnava ka përfunduar studimet master në Ekonomi të Energjisë në Universitetin Rice në Shtetet e Bashkuara të Amerikës, ndërsa studimet bazë i ka kryer në Inxhinieri Elektrike në Universitetin e Prishtinës.
Kjo pozitë deri më tani ishte ushtruar nga Shaban Neziri, i cili ishte emëruar ushtrues detyre në prill të vitit të kaluar, pas përfundimit të marrëdhënies së punës me kryeshefin e atëhershëm ekzekutiv, Evetar Zeqiri. Neziri më parë kishte mbajtur funksionin e zëvendëskryeshefit ekzekutiv të KOSTT-it.
Në njoftimin zyrtar theksohet se Tërnava sjell me vete rreth dhjetë vjet përvojë profesionale dhe menaxheriale në sektorin e energjisë, me synimin që të forcojë më tej rolin e KOSTT-it dhe të kontribuojë në realizimin e objektivave strategjike të ndërmarrjes.
