Lidhja Demokratike e Kosovës ka ftuar qytetarët që të dalin për të votuar në zgjedhjet e sotme lokale.
Tri orë para mbylljes së qendrave të votimit, në LDK thanë se procesi i sotëm zgjedhor po mbahet pa probleme të theksuara.
Zëdhënësi i LDK-së, Besian Mustafa në konferencë për media të dielën tha se qytetarët po tregojnë vetëdije të lartë demokratike.
“Të dhënat nga tereni na bëjnë të ditur se procesi deri tani është në rregull dhe demokratik…Ftoj të gjithë qytetarët e Kosovës që ende nuk kanë votuar që ta bëjnë një gjë të tillë sa më parë, para orës 19:00 kur mbyllen qendrat e votimit”, theksoi ai.
Qytetarët e Kosovës po ushtrojnë sot të drejtën kushtetuese të votës. Këto janë zgjedhjet e rregullta lokale, të cilat mbahen në 38 komuna të Kosovës.
Procesi i votimit në zgjedhjet lokale zhvillohet në 948 qendra të votimit me gjithsej 2,625 vendvotime.
Numri i qytetarëve me të drejtë vote në vendvotime, sipas të dhënave të KQZ-së, është 2 milionë e 69 mijë e 98. Prej tyre, nga jashtë Kosovës janë regjistruar për votim 43 mijë e 993 qytetarë me të drejtë vote. Numri i subjekteve politike të certifikuara për pjesëmarrje në këto zgjedhje është 93, prej të cilave: 32 parti politike, 2 koalicione, 32 iniciativa qytetare dhe 27 kandidatë të pavarur.
