Tifozi më i njohur i kombëtares Ismail Morina “Ballisti”, njeriu që më 14 tetor 2014, ngriti dronin në Beograd me flamurin me simbole shqiptare, kërkon nga futbollistët e kombëtares së Shqipërisë, tri ditë para ndeshjes së të shtunës që të mos bëhen pjesë e “maskaradës”, siç e konsideron ai këtë ndeshje të radhës.
Ballisti me një status në rrjetet sociale ka kërkuar nga kapiteni Berat Gjimshiti që të sillen si profesionistë në fushë. Madje Morina aludon se për këtë skenar të ri, si dikur, “një cifut ndërkombëtar në Tiranë e Beograd” po gatit gjellën duke vendosur rezultatin.
Morina ka një mesazh edhe për futbollistët e kombëtares duke u kujtuar atyre se mbajnë mbi shpinë një “fanellë jo dosido”.
“Mos u bëni pjesë e kësaj maskarade, poshtërsie, në Tiranë ju luajtët një miqësore, jo një ndeshje futbolli. Është në dorën tuaj, në mendjen tuaj nëse dëshironi të ruani integritetin tuaj si njerëz në radhë të parë dhe si profesionist; apo ta shisni shpirtin për dordolecët e lartpërmendur”, shkruan Morina duke shtuar “Zgjidhja është zgjedhja juaj”.
“Dikur nga disa specie nën-njerëzore akuzohesha si “prishës” i marrëdhënieve ndërshtetërore dhe si dikush që përzinte sportin me politikën sot për të njëjtit e kam një mesazh: a jemi live…e dini vetë!!!” e përfundon mesazhin Ballist Morina.
Kujtojmë se në Tetorin 2014, për shkak të dronit që fluturoi mbi stadiumin e Beogradit ndeshja mes Serbisë dhe Shqipërisë u ndërpre; delegacioni shqiptar dhe vëllai i kryeministrit Olsi Rama u akuzuan për incidentin, por e vërteta doli më pas në shesh që kishte qenë gjithçka rastësore. Ajo ndeshje përfundoi në KAS ku pas dhunës së ushtruar ndaj lojtarëve shqiptarë në stadiumin e Beogradit, Shqipëria mori tri pikë “të arta” që e çuan atë për herë të parë në histori në Evropianin 2016, një ngjarje që do të shënohet përherë në kalendar si i pari përfaqësim i Shqipërisë në një kompeticion ndërkombëtar.
