Po vazhdon shkëlqimi i futbollistëve kosovarë nëpër kampionate të ndryshme evropiane dhe një nga shembujt më të mirë është treshja dardane e Hoffenheimit, Fisnik Asllani, Leon Avdullahu dhe Albian Hajdari.
Sipas përditësimeve më të fundit të Transfermarkt, dy nga këta lojtarë kanë përjetuar një rritje të ndjeshme të vlerës së tyre në treg.
Sulmuesit Fisnik Asllani vlera i është rritur nga 8 milionë në 18 milionë euro, falë paraqitjeve të jashtëzakonshme në Bundesliga dhe kontributit të tij në fazën ofensive të skuadrës ku ka shënuar pesë gola dhe ka dhuruar dy asistime në shtatë ndeshje mes kampionatit dhe Kupës së Gjermanisë.
23-vjeçari tani është futbollisti me vlerën më të madhe te Hoffenheim.
Ndërkohë, Leon Avdullahu, mesfushori me teknikë të rafinuar dhe energji të pashtershme, ka parë një rritje nga 10 në 12 milionë euro, duke u bërë një nga talentet më premtuese të klubit gjerman.
Sa i përket Albian Hajdarit, mbrojtësit që i është bashkuar Hoffenheimit së fundmi, vlera e tij mbetet 12 milionë euro, pa ndryshime në këtë përditësim të fundit. Megjithatë, pritshmëritë janë të mëdha që edhe ai të pësojë rritje të shpejtë nëse vazhdon me paraqitje të mira në Bundesliga.
Kjo rritje e vlerave tregon se futbollistët kosovarë po fitojnë gjithnjë e më shumë vëmendje në elitën e futbollit gjerman, ndërsa Hoffenheim po shndërrohet në një bazë të rëndësishme zhvillimi për talentet nga Kosova.
