Skuadra e Trepçës e ka nisur me fitore mbrojtjen e titullit të kampionit në Superligën e Kosovës në basketboll.
Të mërkurën mbrëma, Trepça triumfoi ndaj Golden Eagle Yllit në palestrën “Minatori” në Mitrovicë.
Kjo ndeshje është dashur të zhvillohet vikendin e shkuar në kuadër të xhiros së dytë, por që është shtyrë për shkak të angazhimeve të Trepçës në turneun kualifikues të Ligës së Kampionëve.
Megjithatë, sa i përket duelit me Yllin në duelin e mbetur, rezultati ishte 77:67 në favor të ekipit nga Mitrovica.
Në fakt, Trepça ishte gjatë tërë kohës në epërsi ndaj Yllit, i cili e fitoi çerekun e katërt por që nuk pati ndonjë ndikim për shkak se mitrovicasit veçse kishin krijuar avantazhin përgjatë tre çerekëve tjerë.
Tre lojtarë te Trepça e përfunduan ndeshjen me pikë dyshifrore kurse më efikasi ishte Desmond Cambridge që realizoi 20 pikë, 8 kërcime e 3 asistime.
Në anën tjetër, te skuadra suharekase më i dalluari ishte Terrell Brown me 35 pikë e 9 kërcime.
Për Yllin, kjo është humbja e parë në elitën e basketbollit kosovar pas dy ndeshjeve të luajtura kurse Trepça fitoi ndeshjen e parë në sezonin 2024/25.
Kampionia në fuqi e Kosovës nuk e ka luajtur as duelin e xhiros së parë ndaj Bashkimit për shkak të angazhimit në kualifikimet për Champions, ku tashmë është eliminuar.
Mirëpo, Trepça do të paraqitet në fazën e grupeve të FIBA Europe Cup.
