Përkundër që e fitoi çerekun e fundit me rezultat bindës (24:11), KB Trepça nuk arriti ta mposht skuadrën gjermane, Braunschweig.
Në kuadër të xhiros së pestë, të mërkurën mbrëma, Trepça ka pësuar humbje në udhëtim nga Braunschweigu.
Dueli që i takoi Grupit F, përfundoi me fitoren e thellë të skuadrës gjermane 80:70.
Kampionia e Kosovës, ka regjistruar edhe humbjen e pestë në po aq ndeshje të luajtura në fazën grupore të stinorit të rregullt në FIBA Europe Cup.
Në fakt, në dhjetë minutat e fundit, Trepça pati paraqitje fantastike dhe pati seri 18:0 duke mos lejuar Braunschweigun për gati gjashtë minuta të shënojë pikë.
Megjithatë, epërsia e krijuar në tre çerekët e parë, ia pamundësoi Trepçës të triumfojë në këtë përballje të fortë.
Trepça e fitoi edhe çerekun e dytë (16:14), ndërsa e humbi të parin dhe të tretin me shifrat 25:13, përkatësisht 30:17.
Mustapha Amzil ishte më efikasi te Trepça me 18 pikë e 8 kërcime, ndërsa Drilon Hajrizi regjistroi 15 pikë, 11 kërcime e 4 asistime.
Te Braunschweigu, u dallua Grant Sherfield me 17 pikë të realizuara.
Me këtë humbje, Trepça praktikisht edhe e mbyll aventurën në FIBA Europe Cup në këtë fazë, ndonëse e ka edhe një ndeshje për ta zhvilluar deri në fund.
Zë vendin e fundit në grup me pesë pikë, ndërsa javën e ardhshme luan në udhëtim te skuadra nga Polonia, Anwil.
