Trepça e ka vazhduar dominimin në basketbollin kosovar. Të mërkurën mbrëma skuadra mitrovicase e fitoi Kupën e Kosovës për edicionin 2024/2025.
Në finalen, që në tre çerekët e parë ishte dramatike, Trepça e mposhti Bashkimin e Prizrenit me rezultat 85:79.
Ndeshja finale u zhvillua në Pallatin e Rinisë në Prishtinë. Atmosfera ishte madhështore, ndërsa në palestër ishin tifozët e të dy skuadrave.
Për herë të katërt rresht Kupa e Kosovës shkon në Mitrovicë. Trepça gjithsej ka fituar Kupën tetë herë.
Edicionin e kaluar i fitoi gjithë trofetë, ndërsa këtë edicion tashmë ka Superkupën e Kupën.
