Skuadra e Trepçës ka fituar gjysmëfinalen dramatike ndaj Sigal Prishtinës në kuadër të Superkupës së Kosovës. Edhe pse Trepça vazhdimisht ishte në epërsi, Prishtina ia rrezikoi seriozisht fitoren në minutat e fundit.
Një seri 15:1 në çerekun e katërt, bëri që Prishtina të afrohet në tri pikë të vetme, por dështoi në dy aksionet e fundit për të bërë diçka më shumë ndaj Trepçës. Në fund, Trepça triumfoi me rezultatin e ngushtë 68:55 për të avancuar në finale të këtij turneu që po mbahet në Suharekë.
Skuadra nga Mitrovica pothuajse prej fillimit të ndeshjes ishte në epërsi, e cila pas dy çerekëve shkoi deri në nëntë pikë – 40:31, por finishi i saj ishte tejet dramatik.
Me këtë fitore, Trepça i është hakmarrë Prishtinës për humbjen që ia shkaktoi edicionin e shkuar në finalen e kësaj gare.
Trepça i fitoi tre çerekët e parë, ndërsa në periudhën e fundit Prishtina ishte shumë efikase duke e mbyllur me shifrat 19:9, por që nuk arriti ta evitojë humbjen.
Më i merituari për këtë fitore të Trepçës ishte amerikani Kevin Bracy-Davis, i cili ishte edhe i vetmi me pikë dyshifrore tek ekipi mitrovicas. Ai ndeshjen e mbylli me 25 pikë, 9 kërcime e 4 asistime.
Te Prishtina, më efikasi ishte Derrick Wilson me 16 pikë, 8 kërcime e 6 asistime. Nick Ward shtoi 11 pikë e 9 kërcime, ndërsa Dardan Berisha pati 10 pikë për ekipin nga kryeqyteti.
