Trepça udhëheq 1:0 në serinë gjysmëfinale të Play-Offit, pas fitores ndaj rivales së vjetër Sigal Prishtinës me rezultat 80:65.
“Xehetarët” ishin dominues në këtë ndeshje fillim e mbarim, duke udhëhequr madje deri në plus 23 pikë gjatë pjesës së parë.
Epërsinë e pjesës së parë mitrovicasit e ruajtën deri në fund të duelit për ta fituar aktin e parë, në rrugën drejt finales.
Tekkele Cotton i Trepçës ishte më efektivi me 21 pikë e 6 asistime, i ndihmuar nga Michael Myres Jr. me 19 pikë dhe 5 kërcime dhe Drilon Hajrizi me 17 pikë e 4 kërcime.
Donte Clark me 19 pikë dhe Jordan Davis me 15 pikë ishin më të dalluarit te Prishtina.
Ndeshja e dytë e kësaj serie gjysmëfinale, zhvillohet të mërkurën në kryeqytet.
