Trofeu i parë i sezonit në basketboll, do të ndahet sonte për njërën nga dy ekipet më të mira të këtij edicioni, në garën për trofeun më të çmuar të vendit.
Finalja e Kupës së Kosovës në basketboll ka vënë përballë Trepçën dhe Bashkimin, dy ekipet që sonte nga ora 19:00 në pallatin e Sportit në Prishtinë, do të vendosin për trofeun e parë të sezonit.
Mitrovicasit kanë fituar shtatë herë Kupën e Kosovës, duke përfshirë edhe tri herët e fundit. Bashkimi ka fituar vetëm një herë këtë trofe të rëndësishëm, më 2001.
Në pesë takimet e fundit direkte mes tyre, mitrovicasit kanë tri fitore derisa prizrenasit dy.
Sa i përket garave në Superligë, të dyja skuadrat kanë nga 14 fitore e gjashtë humbje.
Rruga drejt finales nuk ishte aspak e lehtë. Mitrovicasit në çerekfinale eliminuan Proton Cable Prizrenin, kurse në gjysmëfinale rivalin e vjetër, Sigal Prishtinën, ku edhe pse humbën ndeshjen e parë, u rikthyen në atë të dytë për të siguruar biletën për finale.
Bashkimi në çerekfinale eliminoi Borën, derisa në gjysmëfinale Vëllaznimin. Në ndeshjen e parë pësuan nga kuqezinjtë, derisa në përballjen e dytë arritën rikthimin për të siguruar finalen.
Ndeshja finale zhvillohet më 12 shkurt në Prishtinë nga ora 19:00.
