Ishte nisur në drejtim të Pejës.
Por rruga këtij treni që po vinte nga Prishtina iu la në gjysmë.
Kjo për shkak se i njëjti u aksidentua me një veturë në hyrje të qytetit.
Lajmin për këtë e konfirmuan nga Policia e Kosovës, duke treguar se nuk ka të lënduar.
“Rreth orës 10:00 është mësuar se në hyrje të Pejës treni e ka goditur një veturë. Të lënduar nuk ka, njësitë kompetente kanë dalë në vendngjarje”.
Gjithë këtë ngjarje e panë nga afër disa qytetarë të kësaj zone që thanë se nuk është hera e parë që këtu ndodhin këso aksidentesh.
Disa nga ta thonë se mungesa e infrastrukturës është shkaktar i këtyre aksidenteve, derisa bëjnë apel për investim nga institucionet.
“Kjo është shqetësuese boll. Kjo ndodh çdo vit tri raste në vit më së paku ndodhin, rampë s’ka, gjë jo, atëherë këto normal që ndodhin. Me qenë siç duhet, në rregull këta duhet me vendosë rampën këtu, në Pavlan poshtë, kjo është më shqetësuese s’ka ku me shku”, ka deklaruar qytetari, Fazli Krasniqi.
“Problemi te semaforat ajo dihet problemi ku është, valla shteti duhet mi ndreq, shteti veç po flen s’po bën asnjë gjë duhet me i ndreq këto duhet me i rregullu shkaku i tyre bëhet aksidentet” , ka deklaruar qytetari, Naser Bërbati.
“Mendimi jem është që ka nevojë këtu për një laurë duhet me marrë Komuna si përgjegjësi dhe besoj se nëse montohet laura nuk ka me pas aksidente”, ka pohuar qytetari, Muhamet Ahmeti.
Por nga ndërmarrja INFRAKOS në një përgjigje për Tëvë1 kanë bërë të ditur se të gjitha shenjat e nevojshme janë të vendosura në vendin ku ka ndodhur aksidenti.
“Nga informata e parë, Komisioni për Ngjarje të Jashtëzakonshme ka konstatuar qe shkaktar i incidentit ka qenë ngasësi i automjetit i cili nuk i ka dhënë përparësi trenit por ka tentuar të kaloj duke mos respektuar shenjën Stop dhe pa u siguruar për gjendjen në vendkalim. Gjendja infrastrukturore në mirëmbajtje të vendkalimit ka qenë e mirë dhe stabile, ndërsa shqetësimet mbetën qe nuk respektohen shenjat në kryqëzimet në nivel hekurudhë – rrugë nga ngasësit e automjeteve rrugore.”
Aksidente të natyrës së njëjtë ka pasur edhe në disa vende tjera në Kosovë.
