Gjatë së dielës, nuk u raportua për parregullsi në komunën e Shtimes.
Por tri ditë mbrapa zgjedhjeve lokale, në fshatin Belinc të kësaj komune u evidentuan parregullsi.
Anëtari i Partisë Demokratike të Kosovës në KQZ, Ilir Gashi ngre dyshime se në vendvotimin 2207/01, ka pasur keqpërdorim të votës.
“Bazuar në të dhënat e paraqitura, ekzistojnë indikacione të qarta për shkelje të rëndë të procesit zgjedhor, përfshirë dyshimet për përdorimin e metodës së njohur si “Treni Bullgar”, gjetjen e një fletëvotimi fals dhe mungesën e fletëvotimit origjinal. Këto elemente përbëjnë dyshime serioze për kryerjen e veprave penale që cenojnë integritetin e zgjedhjeve. Në këtë drejtim, ftoj organet kompetente, përfshirë Policinë e Kosovës, Prokurorinë dhe organet e tjera hetimore, që të ndërmarrin hetim të menjëhershëm, të plotë dhe të paanshëm për këtë rast, në mënyrë që të sigurohet transparencë dhe përgjegjësi institucionale”, ka thënë Gashi.
E personi i votuar në këtë fletëvotim ku po pretendohet se nuk është origjinali, është Muhamet Ademaj.
Por ai për televizionin tha se kjo letër është gjetur në kutinë për kandidatin për kryetar, e ai kandidon vetëm për asamble dhe nuk ka lidhje më këtë.
Por kjo formë e manipulimit të votave, ka qenë edhe më herët.
Hulumtues nga Instituti Demokratik i Kosovës, Vullnet Bugaqku thotë se e njëjta formë është përdorur edhe në vitin 2009/2010.
Për këtë rast, Partia Demokratike e Kosovës të martën ka dërguar edhe ankesë në Panelin Zgjedhor për Ankesa dhe Parashtresa.
