Kryetarja e Dhomave të Specializuara të Gjykatës Speciale, Ekaterina Trendafilova do të vizitojë Kosovën, ka njoftuar Policia e Kosovës.
Në njoftim thuhet se me këtë rast, Policia në bashkërendim me autoritetet kompetente ndërkombëtare, gjatë kësaj vizite do të angazhohet për ruajtjen e rendit dhe qetësisë publike.
Po ashtu bëhet e ditur se do të ketë ndërprerje të përkohshme të qarkullimit të trafikut në intervale të shkurtra kohore në disa rrugë të caktuara.
“Me datën 12-14 maj 2025, në Republikën e Kosovës, do të qëndrojë për vizitë kryetarja e Dhomave të Specializuara të Gjykatës Speciale, znj. Ekaterina Trendafilova. Me këtë rast, Policia e Kosovës, në bashkërendim me autoritetet kompetente ndërkombëtare, gjatë kësaj vizite, e cila realizohet në Republikën e Kosovës, do të angazhohet për ruajtjen e rendit dhe qetësisë publike. Për të mundësuar qarkullim të lirë sipas itinerarit të lëvizjes si dhe zhvillimin e aktiviteteve apo takimeve të personaliteteve sipas agjendës, Policia e Kosovës do të bëjë ndërprerje të përkohshme të qarkullimit të trafikut (në intervale të shkurtra kohore) të disa segmenteve rrugore, ku edhe mund të ketë riorientim të trafikut në rrugë alternative, andaj Policia e Kosovës kërkon mirëkuptim të plotë nga ana e qytetarëve dhe pjesëmarrësve në trafik”, thuhet në njoftim.
