Tre persona janë vrarë në sulmet izraelite në Libanin jugor të shtunën, duke përfshirë dy anëtarë të Hezbollahut, raporton AFP, duke cituar deklaratat nga grupi militant dhe mediat zyrtare.

Hezbollahu, përmes një deklarate konfirmoi vdekjen e dy luftëtarëve nga fshatrat Kafr Kila dhe Khiam, duke thënë se ata ishin “martirizuar në rrugën për në Jerusalem”.

Agjencia zyrtare Kombëtare e Lajmeve të Libanit tha se “avionët pushtues izraelitë kryen dy bastisje sot në agim në qytetet Kafr Shuba dhe Shebaa”, duke çuar në vdekjen e “shtetasit Qasim Asaad në qytetin Kafr Shuba”.

Sulmet izraelite kanë goditur disa fshatra në Libanin jugor në orët e fundit, sipas Agjencisë Kombëtare të Lajmeve, shkruan The Guardian.

Tensionet janë rritur shumë në kufirin Izrael-Liban, me forcat izraelite dhe Hezbollahun që shkëmbejnë zjarr pothuajse çdo ditë.