Një incident ka ndodhur të mërkurën pas dështimit të seancës në asamblenë e Komunës së Prishtinës.
U raportua se në këtë incident u sulmua kryesuesi i Kuvendit Komunal, Fehmi Kupina.
Sulmi ndaj Kupinës nga Sami Salihu është konfirmuar nga burime brenda Lidhjes së Prishtinës për Tëvë1.
Kupina sipas këtyre burimeve është duke marrë trajtim mjekësor.
Lidhur me këtë incident Policia e Kosovës ka dhënë detaje për teve1.info.
Sipas PK-së për këtë rast janë shoqëruar në polici tre persona
“Sot rreth orës 10:30 është pranuar informata për një rrahje në rrugën “UÇK” në Prishtinë. Me të marrë informatën policia, ka arritur në vendin e ngjarjes dhe ka shoqëruar 3 persona, të cilët ishin përfshirë në rast. Aktualisht policia po vazhdon punën për zbardhjen e rrethanave dhe motiveve që karakterizojnë ngjarjen”, thuhet nga Policia.
Për këtë rast ka shkruar edhe asamblistja e Lidhjes Demokratike të Kosovës, Fiknete Bejta.
Ajo ka thënë se bëhet fjalë për një sulm ndaj asamblistit të kësaj partie, Sami Salihu. Ajo ka akuzuar familjarë të Kupinës për sulmin.
“Pas përfundimit të seancës së Kuvendit të Kryeqytetit, para objektit të Komunës së Prishtinës, ndodhi një akt i papranueshëm dhe i rëndë: u sulmua fizikisht asambleisti ynë, z. Sami Salihu. Ky sulm, i kryer nga djali dhe persona të afërt me kryesuesin e Kuvendit, z. Fehmi Kupina, është jo vetëm një dhunë e paprecedentë ndaj një përfaqësuesi të qytetarëve, por edhe një goditje e rëndë ndaj demokracisë, institucioneve dhe dinjitetit të Kuvendit të Kryeqytetit”, ka shkruar ajo në Facebook.
