Një aksident i rëndë trafiku ka ndodhur sot rreth orës 14:35 në rrugën nacionale Prishtinë–Pejë, ku një kamion me targa vendore ka humbur kontrollin dhe ka përplasur katër automjete të tjera.
Sipas njoftimit të Policisë së Kosovës, dyshohet se drejtuesi i kamionit ka kaluar në anën e kundërt të rrugës duke shkaktuar aksidentin zinxhiror.
Si pasojë e përplasjes, dy persona kanë pësuar lëndime të rënda, ndërsa një tjetër ka marrë lëndime të lehta.
Të gjithë të lënduarit janë dërguar në QKUK për trajtim mjekësor.
Njësitet policore dhe ato hetimore kanë dalë menjëherë në vendin e ngjarjes, ndërsa po punohet për zbardhjen e plotë të rrethanave dhe shkaqeve të këtij aksidenti.
Policia e Kosovës ka apeluar tek shoferët që të respektojnë rregullat e trafikut, të përshtatin shpejtësinë me kushtet e rrugës dhe të tregojnë kujdes të shtuar në drejtim të automjeteve, për të shmangur tragjedi të tilla.
“Si pasojë e këtij aksidenti, deri në këto momente raportohet se dy persona kanë pësuar lëndime të rënda dhe një tjetër ka marrë lëndime të lehta, të cilët janë dërguar në QKUK për trajtimin e nevojshëm mjekësor. Njësitet përkatëse të Policisë së Kosovës kanë dalë menjëherë në vendngjarje dhe po ndërmarrin veprimet e nevojshme hetimore për zbardhjen e plotë të shkaqeve të aksidentit”, thuhet në njoftim./teve1.info/
