Tre burra janë shpallur fajtorë për një zjarrvënie në një depo në Londër, e lidhur me ndihmat për Ukrainën, në emër të grupit mercenar rus Wagner.
Jakeem Rose, 23 vjeç, Ugnius Asmena, 20 vjeç, dhe Nii Mensah, 23 vjeç, u shpallën fajtorë nga Gjykata e Lartë “Old Bailey” për zjarrvënie të rënduar me qëllim rrezikimin e jetës, pas zjarrit të qëllimshëm në njësinë që dërgonte ndihma dhe pajisje satelitore interneti për Ukrainën.
Sulmi ishte organizuar nga Dylan Earl, 20 vjeç, dhe Jake Reeves, 23 vjeç, të cilët tashmë kishin pranuar fajësinë për zjarrvënie të rënduar në emër të grupit Wagner, shkruan BBC.
Dëmi i shkaktuar në këtë sulm në depo në lindje të Londrës vjet ishte rreth 1 milion paund, sipas dëshmisë në Old Bailey.
Një person i katërt, Paul English, 61 vjeç, nga Roehampton, u shpall i pafajshëm.
Grupi Wagner është një organizatë private ushtarake që vepron në emër të shtetit rus, dhe që është shpallur organizatë terroriste nga qeveria britanike.
Mensah, nga Thornton Heath, dhe Rose, nga Croydon, u kapën nga kamerat e sigurisë dhe një video livestream në telefonin e Mensah duke i vënë zjarrin depos që strehonte biznese në pronësi ukrainase.
Livestream-i në FaceTime për Earl dhe Reeves tregonte derdhjen e benzinës mbi dyert e njësisë së depos dhe ndezjen e tyre.
Tetë ekipe zjarrfikëse me 60 zjarrfikës u thirrën në zonën industriale Cromwell në Leyton, pak para mesnatës më 20 mars 2024.
Në natën e sulmit, juria dëgjoi se një shofer kamioni që ndodhej aty pranë, tentoi guximshëm por pa sukses të shuante zjarrin.
Gjatë arratisjes, Rose la pas një thikë të madhe mbi të cilën u gjet më vonë ADN-ja e tij.
Mensah më vonë i shkroi Reeves: “L9 [pseudonimi i Rose] e la Rambo-n e vet në vendngjarje”.
Depoja ishte në shënjestër sepse dërgonte ndihma humanitare dhe pajisje në Ukrainë, përfshirë Starlink, që është kyç për forcat ukrainase.
David Cawthorne, shef i njësisë kundër terrorizmit në Prokurorinë e Kurorës (CPS), tha:
“Është e qartë se ky ishte një sulm i qëllimshëm për shkak të lidhjes së depos me Ukrainën në dërgimin e ndihmave dhe mallrave të tjera”.
Gjatë gjyqit, u dëgjua se Earl i kishte thënë një kontakti të grupit Wagner, të cilin e kishte takuar në Telegram, se dëshironte të kryente një seri “misionesh”, ku zjarrvënia e depos ishte vetëm e para.
U zbuluan plane të tjera që përfshinin zjarrvënie të mëtejshme në një restorant dhe dyqan vere në Mayfair, Londër perëndimore, si dhe rrëmbimin e pronarit të tyre, milionerit dhe disidentit rus Evgeny Chichvarkin.
Mesazhet e rikuperuara nga telefoni i Earl tregonin se ishte bërë vëzhgimi paraprak i objektivave dhe po diskutoheshin planet për përdorimin e eksplozivëve.
Chichvarkin u përshkrua në gjykatë si një “disident rus i profilit të lartë dhe refugjat”, i cili ka qenë kritik i hapur ndaj Presidentit rus Vladimir Putin dhe luftës në Ukrainë. Dy bizneset e tij në Mayfair punësonin së bashku 200 persona dhe vlerësoheshin mbi 30 milionë paund.
Earl, nga Elmesthorpe në Leicester, është personi i parë i dënuar sipas Ligjit për Sigurinë Kombëtare të miratuar në 2023 për të përballuar rrezikun në rritje nga aktivitetet armiqësore të shteteve të huaja.
Një i pestë, Ashton Evans, nga Newport, u shpall fajtor për një akuzë për mosraportim të informacionit mbi akte terroriste, por u shpall i pafajshëm për mosraportimin e zjarrvënies në depo.
Një i gjashtë, Dmitrijus Paulauskas, nga Croydon, u shpall i pafajshëm për dy akuza për mosraportim të informacionit mbi akte terroriste.
Komandanti Dominic Murphy, shef i Njësisë Kundër Terrorizmit në Met Police, tha:
“Ky rast është një shembull i qartë se si një organizatë e lidhur me shtetin rus përdor ‘proxies’ – në këtë rast burra britanikë – për të kryer aktivitete kriminale shumë serioze në këtë vend në emër të tyre.”
“Shpresoj që këto dënime të jenë një paralajmërim i fortë për pasojat shumë serioze të kryerjes së veprave penale në emër të një shteti të huaj”.
