Në kuadër të ligjit nr. 124/2024 “Për mbrojtjen e të dhënave personale”, Zyra e Komisionerit për të Drejtën e Informimit dhe Mbrojtjen e të Dhënave Personale ka miratuar vendimin nr. 1 datë 30.4.2025 “Për përcaktimin e shteteve që sigurojnë një nivel të mjaftueshëm të mbrojtjes së të dhënave personale”.
Në vendimin e Komisionerit përcaktohet lista e shteteve të sigurta për transferimin ndërkombëtar të të dhënave personale në shtetet anëtare të Bashkimit Evropian që zbatojnë Rregulloren e Përgjithshme për Mbrojtjen e të Dhënave Personale (GDPR), shtetet anëtare të Zonës Ekonomike Evropiane, të cilat në bazë të Marrëveshjes së EEA3 zbatojnë po ashtu GDPR, palët e Konventës 108 të Këshillit të Evropës, etj.
Gjithashtu, në këtë akt është reflektuar edhe njohja reciproke mes Shqipërisë dhe Kosovës për të drejtën për transferimin e të dhënave personale si shtete me nivel të mjaftueshëm të mbrojtjes së të dhënave. Kjo është realizuar me vendimin nr. 7, datë 29.4.2025, të Komisionerit për të Drejtën e Informimit dhe Mbrojtjen e të Dhënave Personale dhe vendimin nr. 21 të Komisioneres së Agjencisë për Informim dhe Privatësi së Kosovës.
Njohja reciproke mes Shqipërisë dhe Kosovës për transferimin ndërkombëtar të të dhënave personale sjell një sërë lehtësirash të rëndësishme për kontrolluesit e të dy shteteve. Në këtë kuadër, mundësohet shkëmbim më i shpejtë i të dhënave si dhe rritet efikasiteti në bashkëpunimin ndërkombëtar. Kjo njohje reciproke mbështet zhvillimin e mëtejshëm të tregut dhe shërbimeve digjitale në rajon, duke mundësuar gjithashtu një nivel më të lartë të mbrojtjes së të dhënave personale dhe të të drejtave të individëve. /PCWorld Albanian
