Departamenti për Kufij në kuadër të Policisë së Kosovës, në bashkëpunim me Policinë Federale Gjermane, ka organizuar një trajnim taktik për kontrollin e kamionëve në pikëkalimet kufitare, duke përdorur një pajisje speciale për detektimin e rrahjeve të zemrës (heartbeat detector).
Kjo teknologji inovative mundëson identifikimin e rasteve të kontrabandimit me njerëz pa pasur nevojë për hapjen e automjeteve, duke u bazuar vetëm në imazhet që sigurohen nga pajisja.
Trajnimi ka nisur më 5 maj dhe do të zgjasë deri më 9 maj 2025. Në të po marrin pjesë 15 zyrtarë policorë nga tri drejtori rajonale të Policisë Kufitare. Ata po trajnohen nga instruktorë profesionistë gjermanë për përdorimin e kësaj teknologjie moderne.
Ky trajnim është vlerësuar si jashtëzakonisht profesional dhe i dobishëm si nga instruktorët gjermanë, ashtu edhe nga pjesëmarrësit kosovarë. Gjatë trajnimit janë shkëmbyer përvoja të ndërsjella në teknikat e kontrollit kufitar, sigurinë gjatë kontrollit të personave dhe automjeteve, si dhe në përdorimin efektiv të pajisjes për detektimin e kontrabandimit me njerëz.
Policia e Kosovës shpreh mirënjohjen e saj për mbështetjen e vazhdueshme të shtetit gjerman, Ambasadës Gjermane dhe Policisë Federale Gjermane në ngritjen e kapaciteteve njerëzore dhe logjistike të Policisë së Kosovës, veçanërisht në fushën e kontrollit kufitar.
