Trajneri i Rubin Kazanit, Rashid Rakhimov, nuk është i kënaqur me punën që sulmuesi i kësaj skuadre, Mirlind Daku, e bën gjatë kohës sa është i grumbulluar me Shqipërinë.
Daku ishte i grumbulluar me kuqezinjtë për ndeshjet me Andorrën dhe Anglinë, por nuk e fitoi rastin të luante.
Dhe Rakhimov, që ka përvojë të gjatë në futboll, vlerëson se Daku nuk ka bërë punë të mjaftueshme gjatë kohës te Shqipëria. Përgjegjës për këtë e ka lënë shtabin teknik të Shqipërisë, përkatësisht selektorin Sylvinho.
Derisa ka folur për Dakun, Rakhimovi ka përmendur edhe përfaqësuesen e Kosovës.
Dhe ka vlerësuar punën që Franco Foda e bën me përfaqësuesen e Kosovës. Lojtari i Rubin Kazanit, Veldin Hoxha, është pjesë e Kosovës dhe po bëhet gjithnjë e më i rëndësishëm.
Daku të shtunën shënoi golin e vetëm për Rubin Kazanin në fitoren 1:0 ndaj Akhmat Groznyt, në kuadër të kampionatit të Rusisë.
Daku është lojtari kryesor në sulm i Rubin Kazanit, por nuk kishte shënuar gol që nga 20 shtatori. Tani i ka nëntë gola në 16 paraqitje.
Derisa ka folur për presionin që kishte Daku për mungesën e golave, Rakhimov ka përmendur punën që bëhet te Shqipëria e Kosova.
“Fola me Dakun për të hequr presionin nga ai. E telefonova dje. Pasi u kthye nga ekipi kombëtar, e telefonova. I thashë se nuk më pëlqente mënyra se si po punonin në ekipin kombëtar. Ne marrim informacion për ngarkesën e punës te Shqipëria dhe Kosova dhe pamë se si punonte Daku pa luajtur. Ishte e qartë se nuk ishte i tonifikuar. Trajneri në Kosovë është gjerman. Dhe ai nuk e ka idenë që nëse nuk luan, nuk stërvitesh. Por me Dakun, volumi ishte për të ardhur keq”, ka thënë Rakhimov në konferencën për shtyp pas ndeshjes.
Ai madje e ka pyetur Dakun nëse nuk po bën asgjë gjatë grumbullimit me kuqezinjtë.
“E pyeta, ‘a nuk po bën asgjë?’. Po i mëson profesionalizëm. Po i japim një program për ta mbajtur të përgatitur. I thashë që edhe Messi ka periudha kur nuk shënon. Ju nuk duhet të mendoni për këtë, duhet të kryeni punën tuaj. Duhet të vlerësoni se si liga ka filluar t’iu trajtojë. Të gjithë po të shikojnë. Sot bëri punë shumë të mirë dhe bëri atë që di ta bëjë më së miri”, ka shtuar Rakhimov.
Skuadra e Rubin Kazanit është shumë e varur nga Daku. Madje ka pasur vlerësime të shumta që nëse Daku nuk shënon, Kazani nuk fiton. Me këtë konstatim nuk është pajtuar 60-vjeçari Rakhimov.
“Është e qartë që ai sjell kualitet. Është i matur. E kemi ngritur dhe tani të themi se nuk mundemi pa të? Ne vetëm duhet të gjejmë lojtarë dhe të shtojmë të tjerë. Të gjithë e njohin atë, e studiojnë. Madje edhe kur ishte një sulm sot, trajneri i ekipit kundërshtar u ka bërtitur lojtarëve që mos ta lënë Dakun vetëm me një lojtar. Ai është aset”, ka thënë Rakhimov.
Për 27-vjeçarin Daku, ky është edicioni i tretë në kampionatin e Rusisë.
