Skuadra e njohur rumune, Steaua e Bukureshtit, ka mbërritur në Kosovë, ku nesër do të ndeshen me kampionen e Kosovës, Dritën.
Kjo ndeshje i përket raundit të tretë kualifikues në Ligën e Evropës dhe zhvillohet në stadiumin “Fadil Vokrri” nga ora 20:00.
Kjo përballje pritet të jetë shumë e fortë dhe vendimtare për të dyja skuadrat, që kërkojnë të vazhdojnë rrugëtimin në këtë kompeticion prestigjioz europian.
Ndeshja e parë, e zhvilluar në Bukuresht, përfundoi me rezultatin 3-2 në favor të rumunëve, ndërsa trajneri i Steuas, Elias Charalambous, në konferencë për shtyp tha se i pret një ndeshje tejet e vështirë.
Trajneri qipriot e vlerësoi shumë Dritën, teksa për ekipin e tij tha se nuk është ardhur për t’u mbrojtur dhe do të vazhdojë me stilin e lojës që ata e bëjnë.
“Presim ndeshje të fortë kundër ekipit të organizuar. Ndeshja nesër është 50 me 50. E kemi analizuar ndeshjen e parë për të parë se ku kemi pasur vështirësi dhe të përmirësojmë gabimet tona. Nga loja e parë ne pranuam dy gola të lehtë, dhe shpresoj të jemi përmirësuar aty. E përsëris, ndeshje e vështirë. Duhet të shënojmë gol, nuk kemi ardhur të mbrohemi.”
Një temë që u diskutua ishte edhe siguria dhe pritja në Kosovë, ku trajneri i Steuas hodhi poshtë lajmet e fundit në mediat rumune që e paraqisnin Kosovën si një vend të rrezikshëm.
Në të kundërtën, ai tha se për Kosovën, që nuk është hera e parë që e ka vizituar, ka vetëm fjalë të mira.
“Kam përshtypje fantastike prej kur kemi zbritur në Kosovë, kemi takuar dashamirësi nga të gjithë. Njerëzit na kanë mirëpritur siç është më së miri që nga fillimi. Deri më tani, për Kosovën kam vetëm fjalë të mira për të thënë. Këtu ka luajtur edhe Rumania dhe nuk ka asnjë problem. Gjithçka po ecën mirë, e Kosova po përparon dita-ditës.”
Në fund, trajneri 44-vjeçar lavdëroi cilësinë e futbollit kosovar dhe “brumin” që prodhon kampionati vendor, duke veçuar lojtarët shqiptarë që aktivizohen në kampionatin rumun.
Ai nuk e përjashtoi mundësinë që në të ardhmen të përfshijë në skuadër ndonjë futbollist të Dritës.
“Ka shumë lojtarë nga Kosova në Rumani, edhe ata tregojnë se vlejnë, por në këtë moment nuk e kam ndërmend ndonjë lojtar të Dritës. Do të shohim më vonë, ndoshta pas ndeshjes.”
Në përballjen me Steuën e Bukureshtit, një klub me traditë dhe përvojë të madhe në kompeticionet europiane, Drita do të luajë në shtëpi me përkrahjen e zjarrtë të tifozëve të saj, të cilët pritet të krijojnë një atmosferë fantastike në stadium.
