Ministri i Shëndetësisë Arben Taravari tha se 118 persona janë shtruar në spitalet e Koçanit, Shtipi dhe Shkupit.
Të gjitha kapacitetet janë vënë në funksion dhe të gjithë pacientët janë shtruar në spitale dhe marrin trajtimin e duhur, shkruan Alsat.
Taravari nuk deshi të japë detaje lidhur me gjendjen shëndetësore të të lënduarve.
Ai tha se për këtë do të njoftojë pasi t’i vizitojë të gjitha spitalet në Shkup dhe Koçan e Shtip dhe bisedojë me mjeket që i trajtojnë.
Përndryshe, në këtë tragjedi kanë humbur jetën 51 person.
Ndërkohë ka reaguar edhe kryeministri i Maqedonisë së Veriut, Hristijan Mickoski, i cili është shprehur i tmerruar nga tragjedia në Koçan.
Ai tha se kjo është ditë e rëndë për Maqedoninë, pasi humbja është shumë e madhe, dhembja e familjes nuk mund të përshkruhet.
Presidentja e shtetit, Gordana Siljanovksa Davkova vizitoi të lënduarit në Klinikën për sëmundje kirurgjikale Shen Naumi i Ohrit.
Ajo shprehu keqardhje të thellë për tragjedinë ku humbën jetën shumë të rinj dhe iu uroi shërim të shpejtë të të lënduarve. Ajo tha se ndihmë kanë ofruar autoritetet shëndetësore nga Serbia dhe Bullgaria.
