Prokuroria për e krimit të organizuar ka zgjeruar hetimin për zyrtarët policorë në lidhje me tragjedinë në Koçan, në të cilën e humbën jetën 61 persona, mes të cilëve 6 të mitur, ndërsa rreth 200 të tjerë u lënduan. Janë arrestuar edhe 7 policë dhe inspektorë të MPB-së. Me këtë, numri i zyrtarëve policorë të përfshirë në hetim ka shkuar në 17. Të përfshirët janë nga rrethi i Koçanit dhe Shtipit, ndërsa dyshohen se kanë dhënë pëlqim se kabareja e shkrumbuar “Pulse” i ka plotësuar kushtet ligjore për punë në pjesën e mbrojtjes së rendit dhe qetësisë publike dhe të komunikacionit, edhe pse realisht nuk i ka plotësuar. Veprimi i tyre i ka mundësuar kabaresë që të marrë dritë jeshile për punë.
Hetim të veçantë për tragjedinë, po kryen edhe Prokuroria Themelore Publike e Koçanit. Procedura hetimore deri më tani përfshin gjithsej 52 persona fizik dhe 3 juridik. Harku kohor i hetimit, përfshin është prej vitit 2012 kur është hapur diskoteka e deri në mëngjesi ne kobshëm të 16 marsit të këtij viti. Sipas Prokurorisë, të dyshuarit gjatë kësaj periudhe me veprimet ose mosveprimet e tyre, kanë lejuar që të funksionojë kabareja edhe pse nuk i ka plotësuar kushtet minimale teknike për mbrojtje kundër zjarrit, dokumentacionin, por edhe rregullat e tjera, sidomos në aspektin e lejimit të futjes në objekt të personave nën moshën 18-vjeçare. Për këtë, në hetim është i përfshirë pronari joformal i kabaresë “Pulse” Dejan Jovanovski – Deko, bashkë me djalin e tij, por edhe pjesëtarët e stafit të sigurimit të objektit. Gjithashtu, sipas njoftimeve të Prokurorisë, janë të përfshirë edhe dy anëtarë të grupit muzikor “DNK”, të cilët mbrëmjen tragjike kanë performuar. Hetimi, është zgjeruar edhe në aspektin e përgjegjësisë së drejtuesve dhe përgjegjësve të institucioneve në 13 vitet e fundit.
Në mesin e të dyshuarve janë tre ish kryetarë të Komunës së Koçanit, duke përfshirë edhe kryetarin në kohën kur ndodhi tragjedia Lupço Papazov. Në listë janë edhe katër ish ministra të Ekonomisë, konkretisht Kreshnik Bekteshi, Driton Kuçi, Bekim Neziri dhe Valon Saraçini. Po hetohen drejtorët që kanë shërbyer në Drejtorinë për Mbrojtje dhe Shpëtim, duke filluar nga Shaban Saliu, Adnan Xhaferovski, Bekim Maksuti dhe Xhevat Selami. Në mesin e të dyshuarve janë edhe ish drejtorët e Inspektoratit të Tregut Goran Trajkovski dhe Viktor Demerxhiev.
Hetimi, sipas paralajmërimeve do të vazhdojë edhe dy muaj, ndërsa nuk përjashtohet mundësia që edhe më tej të zgjerohet. Për shkak të vëllimit të madh të lëndës, Prokuroria ka marrë në pyetje qindra dëshmitarë. /Alsat.mk
