Ndërmarrja komunale “Trafiku Urban” ka njoftuar se ofrimi i shërbimit të transportit publik mund të pezullohet plotësisht nga java e ardhshme, për shkak të pamundësisë financiare të shkaktuar nga bllokimi i mjeteve buxhetore.
Sipas njoftimit, vonesat në lëshimin e mjeteve nga Qeveria e Kosovës, përkatësisht Ministria e Financave, kanë penguar Komunën e Prishtinës të shlyejë detyrimet ndaj ndërmarrjes.
“Si rrjedhojë, “Trafiku Urban” po përballet me vështirësi të theksuara financiare, duke cenuar funksionimin operativ dhe aftësinë për të vazhduar ofrimin e shërbimit për qytetarët”, thuhet në njoftim.
Edhe pse siç thuhet “Trafiku Urban” ka bilanc pozitiv dhe performancë të qëndrueshme, vonesat në pagesa që nga korriku kanë ndikuar tek furnitorët, partnerët dhe proceset teknike të brendshme.
Ndërmarrja apelon për zgjidhje të menjëhershme të bllokimit financiar, për të shmangur ndërprerjen e shërbimit për rreth 60 mijë qytetarë që përdorin transportin publik çdo ditë.
