Nga pjesa e Hajvalisë, çdo ditë, Habib Plakiqi vjen në qendër të Prishtinës.
90 vjeçari përdor linjat e Trafikut Urban për të kryer shërbimet e përditshme që i ka.
Por nga e hëna, ai nuk do të mund të përdor autobusët pas paralajmërimit për pezullim të transportit publik nga ndërmarrja “Trafiku Urban”.
Ai thotë se kjo do ia vështirësojë lëvizjet atij nga periferia në qendër të qytetit.
“Këqyre me kërryle jam, pa autobus nuk mundem me lëvizë, nuk ke pushtet çfarë të dojnë le të bëjnë”, tregon Plakiqi.
Por jo vetëm këtij të moshuari, edhe shumë qytetarë të tjerë shprehen të shqetësuar rreth këtij paralajmërimi.
“Po e përdori, qe qitash me linja të “Trafikut Urban” kam udhëtuar, kjo është një pengesë shumë e madhe për popullatën, ata duhet gjithqysh me bë një zgjidhje”, tregon Abdurrahman Vitija.
“Jo të mjeku, jo me ble barnat, se po ka diferenca diku me shtrenjtë diku me lirë, e vështirësi ka me pas shumë”, thotë qytetari Naman Sijarina.
“Në këmbë nuk mundem me udhëtu prej periferie. Për çdo ditë e shfrytëzojmë përveç të dielave”, shprehet një qytetar tjetër.
Nga ndërmarrja “Trafiku Urban kanë paralajmëruar se nga java e ardhshme do të ndërpriten të gjitha linjat për shkak të vonesave në pagesë që nga muaji korrik.
“N.P.K. “Trafiku Urban” SH.A. njofton se ofrimi i shërbimit të transportit publik rrezikon të pezullohet plotësisht nga java e ardhshme, për shkak të pamundësisë financiare të shkaktuar nga bllokimi i mjeteve buxhetore. Kjo situatë ka ardhur si rezultat i moslëshimit të mjeteve nga Qeveria e Kosovës, përkatësisht Ministria e Financave, çka ka pamundësuar Komunën e Prishtinës të shlyejë detyrimet ndaj ndërmarrjes. Si rrjedhojë, “Trafiku Urban” po përballet me vështirësi të theksuara financiare, duke cenuar funksionimin operativ dhe aftësinë për të vazhduar ofrimin e shërbimit për qytetarët”, thuhet në njoftim.
Nga kjo ndërmarrje kanë bërë të ditur për tëvë1, se borxhi total që komuna e Prishtinës u ka, kap shifrën mbi 2.7 milionë euro.
E nga Komuna thonë se nuk alternativa për zgjedhjen e problemit për shkak të bllokimit të buxhetit.
“Kryeqyteti prej muajit korrik është mundu me gjetë forma alternative, një borxh i akumuluar i cili ka mbërrirë në atë pikën ku nuk ka mundësi më me vazhdu dhe ku komuna nuk i ka kryer obligimet financiare ndaj edhe ndërrmarrjeve edhe transportuesit privat dhe kemi mbërritur në atë pikën ku na njoftuan që shërbimet do na i ndërpresin javën tjetër”, tha zëdhënësi i Komunës së Prishtinës, Pëllumb Bajçinovci.
Bllokimi i buxhetit, sipas zëdhënësit të Komunës, ka sjellë edhe probleme të tjera në kryeqytet.
“Sfida financiare nuk e përfshijnë vetëm trafikun në kryeqytet kemi telashe të ndryshme në projektet ekzistuese, projekte të cilat do të vijnë dhe realisht në të gjitha shërbimet komunale që jepen për qytetarët. Kemi njoftimin që është ndërprerë energjia elektrike në tri shkollat dhe në dy kopshte në kryeqytet kemi një numër të fëmijëve që nuk do të marrin atë shërbimin bazik”.
Shkak i bllokimit të buxhetit, Shkolla “Xhemajl Mustafa”, shkolla “Iliria” dhe shkolla e Gjelbër si dhe dy institucionet parashkollore në kryeqytet kanë mbetur pa energji elektrike.
