Një trafik droge nga Shqipëria drejt Kosovës është shpërbërë nga policia.
Si rezultat janë arrestuar dy persona nga Kosova, një nga Maqedonia e Veriut ndërsa tre të tjerë janë në kërkim.
Në pikën kufitare të Qafë Prushit në Kukës, në dalje të Shqipërisë u arrestua 38-vjeçari J. K., banues në Gjakovë, pasi nga kontrolli në automjetin tip “Peugeot” që drejtonte u gjetën rreth 32.7 kilogramë lëndë narkotike kanabis.
Sipas hetimeve të policisë 38-vjeçarit ia kishin dhënë makinën bashkë me lëndën narkotike në Morinë dy persona, G. M., nga Kosova, dhe A. A., nga Maqedonia e Veriut, kundrejt pagesës për ta dërguar në Kosovë, raporton TCH.
Gjithashtu në këtë trafik droge janë të përfshirë edhe 1 maqedonas dhe dy serbë. Nga njoftimi i policisë po vijon puna për kapjen e tyre në bashkëpunim me policitë homologe.
Sasia e lëndës narkotike, e ndarë në disa pako, u sekuestrua në cilësinë e provës materiale, së bashku me automjetin e 38-vjeçarit.
Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Kukës, për veprime të mëtejshme, për veprën penale “Trafikimi i narkotikëve”, kryer në bashkëpunim.
