Si rezultat i një pune dinamike disamujore të një grupi profesionistësh me përvojë shumëvjeçare, nga sot (22.02.2022) tregu medial i Kosovës u pasurua me dy projekte të reja të mëdha: me televizionin Tëvë1 dhe me portalin e lajmeve Teve1.info.
Jemi të vetëdijshëm se në Kosovë dhe në hapësirat gjithëshqiptare asnjëherë nuk ka pasur më shumë kanale televizive dhe medie online, por nëse shtrohet pyetja nëse në treg ka mjaftueshëm media serioze prej të cilave mund të informohesh drejtë, atëherë përgjigja del negative.
Bazuar në këtë, Tëvë1 dhe Teve1.info mëtojnë të jenë hapësira ku lajmi do të jetë vetëm lajm, ndërsa analiza e bazuar në mendim dhe kritikë objektive.
Projekti ynë do të jetë zëri Juaj dhe i familjeve Tuaja, meqë do të plasojmë gjërat me vlerë, për interesin Tuaj. Ndërsa, me një skemë të pasur programore dhe transmetim 24 orësh, do të jemi përkrah të gjitha grupmoshave e kategorive shoqërore – qofshit Ju në Kosovë apo në diasporë.
Ne pajtohemi me atë që e thonë ekspertët e gazetarisë botërore, se sot nuk mjafton që të japësh lajmet e ditës që janë të njohura për të gjithë, prandaj do të ofrojmë kontekst, perspektivë dhe analizë që të mund t’u hynte në funksion të krijimit të një gjykimi rreth apo mbi atë që po ndodhë në vend e më gjerë.
Në këtë mision, jeni Ju që mund të ndihmoni në prodhimin e informacionit duke raportuar për problemet, sukseset, dështimet, nevojat, konfliktet, parregullsitë e për çka jo tjetër.
Më shumë se debate politike, ne do të ofrojmë emisione me karakter argëtues, edukativ, aso që nxisin betejën në dije, emisione sportive, pa lënë anash as ato që kanë të bëjnë me ekonominë.
Ekipi i portalit do të përkujdeset që t’u informojë në kohë reale për zhvillimet në vend e më gjerë dhe t’ua shpalos punën që bëhet nga ekipi i televizionit.
Lajmet dhe raportet në teve1.info do të jenë me autorësi, e jo “copy paste”.
Gjithçka që do të shihni në ekranet e televizioneve tuaja, e që është nën logon “tëvë1”, do të jetë rezultat i punës së producentëve, organizatorëve, kreatorëve, regjisorëve, realizatorëve, montazhierëve, kameramanëve, ndriçuesve e tonistëve si dhe ekspertëve të IT-së e të dizajnit.
Na ndiqni në këta numra: 7- Telkos, 11- IPKO dhe 7- Telekom.
Ecim së bashku…
