Me të gjitha votat për, asnjë abstemin dhe asnjë kundër u miratua shqyrtimi i Propozim-vendimit për shqyrtimin e mëtejmë të kërkesës për shpronësim për interes publik të pronave të cilat preken nga realizimi i Projektit “Ndërtimi i parkut Fotovoltaik” për nevojat e korporatës Energjetike të Kosovës, Zona Industriale Kryshevc, komuna e Obiliqit dhe Zona Kadastrale Fushë Kosovë,Komuna Fushë Kosovë.
Me këtë rast kryeministri Albin Kurti tha se me miratimin e këtij propozim vendimi për shpronësim krijohet mundësia për realizimin e projektit, ndërtimi i parkut fotovoltaik që bëhet në bashkëfinancim.
“Qëllimi i këtij projekti është ndërtimi i parkut me panele solare për prodhim të energjisë elektrike me kapacitet prej 100 megavat”, tha Kurti.
Ministri i Mjedisit, Planifikimit Hapsinor dhe Infranstrukturës, Liburn Aliu tha se Departamenti i shpronësimit me datën 01.9.2022, nga Korporata Energjetike e Kosovës, ka pranuar kërkesën për shpronësim të pronave të paluajtshme të pronarëve dhe zotëruesve të intersit të cilat preken nga realizimi i projektit “Ndërtimi i Parkut Fotovoltaik” për nevojat e Korporatës energjetike të Kosovës.
“Është konstatuar se kërkesa dhe laborati i plotëson kushtet ligjore të përcaktuara me ligj..Për realizimin e këtij projekti është e nevojshme që të kryhen procedurat e shpronësimit dhe vlerësimit të pronës për të gjithë pronarët të cilët janë të evidentuar në tabelat e laboratit të shpronësimit”, tha Aliu.
