Arbër Tolaj nga Aleanca për Ardhmërinë e Kosovës (AAK) është shprehur i bindur se partia e tij do të dalë fituese në zgjedhjet e ardhshme, duke theksuar se AAK-ja ka vizion dhe është e lidhur ngushtë me qytetarët.
I ftuar në emisionin “Mesditë” në Tëvë1, Tolaj tha se slogani i fushatës “Krah teje” pasqyron qasjen e partisë për të qenë pranë çdo shtrese të shoqërisë.
“AAK-ja, ka vizion dhe jo rastësisht në këtë garë jemi pjesë e rëndësishme dhe besoj edhe fituese, kjo duke iu referuar edhe sloganit tonë ‘Krah teje’. Me slogan tregojmë se kemi përfshirë moton që ne kemi qenë dhe prapë do të jemi krah i qytetarëve, krah i punëtorëve shëndetësorë, arsimtarëve, do të jemi në krah të pensionistëve, krah rinisë dhe krah i sportit në përgjithësi”, tha Tolaj.
Sa i përket bashkëpunimit me subjektet e tjera politike, Tolaj tha se LVV-ja nuk i ka bërë ftesë AAK-së për bisedime apo ofertë bashkëqeverisjeje, por Aleanca ka qenë e hapur për dialog.
“Aleanca gjithmonë ka qenë dhe është e gatshme të ofrojë bashkëpunim dhe qasje konstruktive gjithmonë kur bëhet fjalë për çështjet e mëdha nacionale. Aleanca do të kishte qenë e gatshme për të bashkëpunuar apo për të bashkëbiseduar dhe për të ardhur deri te një zgjidhje, e cila do të ishte në të mirë të qytetarëve”, deklaroi ai. /teve1.info/
