Juventusi pëson humbjen e dytë radhazi në Serinë A dhe praktikisht e bën të pamundur renditjen mes katër skuadrave më të mira, me synim pjesëmarrjen në Champions sezonin e ardhshëm (mund të luajë në Champions edhe nëse fiton Europa League-n).
Bardhezinjtë dështuan të merrnin pikë në “Mapei Stadium”, përballë Sassuolon, duke i zhgënjyer sërish tifozët, që e ende e kanë të freskët disfatën me Lazion në “Olimpico”.
Gjatë pjesës së parë, portieri i bardhezinjve, Perin, i mohoi golin francezit Gregoire Defrel, por s’mund të bënte asgjë në minutën e 74-t, kur i njëjti futbollist nuk gaboi në mundësinë që iu dha brenda zonës.
Vetëm pak minuta pas golit të shënuar nga Sassuolo, Nedim Bajrami (mes lojtarëve me notë më të lartë te Sassuolo), i aktivizuar titullar nga trajneri Dionisi, ia la vendin Zorteas.
Asgjë nuk ndryshoi në minutat e fundit, me Sassuolon që mori tri pikë me shumë vlerë, që e ngjitin në vendin e 10-të me 40 pikë.
