Një tjetër largim nga përfaqësuesja e Kosovës U21.
Dion Berisha i cili luajti 24 minuta për Kosovën U21 në ndeshjen ndaj Polonisë dhe dhjetë minuta kundër Gjermanisë në muajin e kaluar, nuk do të paraqitet më në asnjë ndeshje për Shpresat e Kosovës.
Berisha të mërkurën është përfshirë në listën e Shqipërisë U21 për ndeshjet kualifikuese të “Euro 2025” kundër Finlandës dhe Malit të Zi.
Berisha 20-vjeçar është pjesë e ekipit të dytë të Bayernit, ndërsa në total për shpresat e Kosovës ka të zhvilluara katër ndeshje, derisa ka edhe një gol të shënuar.
Poashtu ai a luajtur edhe për Kosovën U17 dhe U16, por nga ky muaj, ai do ta përfaqësojë Shqipërinë. Është ky largimi i radhës i lojtarëve nga grupmoshat e reja të Kosovës në drejtim të Shqipërisë.
Në listën e selektorit Alban Bushit është edhe Enis Shabani. Shabani, i cili edicionin e kaluar debutoi në Bundesligë me Mainzin dhe ka luajtur për U19 të Gjermanisë, Kosova kishte shprehur interesim mirëpo tani 20-vjeçari i cili luan për ekipin e dytë të Mainzit është pjesë e shpresave kuqezinjve.
“Nuk mungojnë risitë në listën e Kombëtares U-21, teksa për herë të parë trajneri Alban Bushi ka ftuar portierin Brajan Lenja nga skuadra e Luzit, mbrojtësin Brayan Boci (Lecco – Serie B ), mesfushorin Enis Shabani nga skuadra gjermane Mainz 05 II dhe sulmuesin Dion Berisha (Bayern II)”, shkruhet në njoftimin e Federatës shqiptare.
Shqipëria U21 luan më 13 tetor në udhëtim te Finlanda, ndërsa katër ditë më vonë e pret Malin e Zi. Bushi për këto ndeshje që i takojnë Grupit E kualifikues, ka ftuar 24 futbollistë, përfshirë edhe Medon Berishën e Adrion Pajazitin, të cilët në të shkuarën kanë luajtur për Kosovën U21.
Shqipëria U21 po synon kualifikikimin në Evropianin e vitit 2025 dhe pas dy ndeshjeve të luajtura deri më tani në këtë cikël eliminator, ka shënuar dy fitore dhe me gjashtë pikë të mbledhura i prin grupit.
