Specialja ka vazhduar me bastisje për të dytën ditë me radhë ndaj ish bashkëpunëtorët e ish presidentit Thaçi. Kësaj here cak ishte ish këshilltari tjetër Artan Behrami. Sipas avokatit të tij kjo bastisje kishte një varg shkeljesh ligjore.
Tri vetura të Misionit të Bashkimit Evropian për Sundimin e Ligjit në Kosovë, zunë vend në parkingun e një banesë në një lagje të kryeqytetit.
Zyrtarët e saj, filluan një bastisje tjetër tek një tjetër ish këshilltar i ish presidentit, Hashim Thaçi.
Se aksione të tilla po kryhen në vazhdimësi e konfirmoi edhe Zyra e Prokurorjt të Specializuar.
“Zyra e Prokurorit të Specializuar është duke zhvilluar operacione të vazhdueshme në Kosovë. Operacionet e ZPS – së po mbështeten nga Policia e Kosovës dhe Misioni i Bashkimit Evropian për Sundimin e Ligjit në Kosovë (EULEX)”, ka deklaruar zëdhënësi i Zyrës së Prokurorit të Specializar, Christopher Bennett.
Pjesëtarë të Policisë kishin zënë pozicione në hyrje të banesës dhe në hyrje të parkingut.
Ata ruanin çdo hyrje dalje.
E disa orë pas shkuarjes së EULEX-it, në vendngjarje erdhi edhe avokati i Behramit, Artan Qerkini.
Pas kryerjes së bastisjes, Qerkini tregoi se çka u konfiskua.
Tutje ai numëroi disa shkelje ligjore të cilat ai pretendon se u bënë me këtë bastisje.
Edhe Behrami i quajti këto bastisje si të palogjikshme.
Një dite më parë, u bastistën shtëpitë e dy ish këshilltarëve tjerë të ish presidentit Thaçi, Blerim Shala dhe Bashkim Smakaj, ky i fundit ka qenë edhe ish shef i AKI-së.
