TikTok u gjobit në Europë me 530 milionë euro nga autoritetet Europiane të privatësisë ditën e Premte lidhur me shqetësimet për mënyrën sesi mbron informacionin e përdoruesit dhe u urdhërua të ndërpriste transferimin e të dhënave në Kinë.
Komisioni Irlandez i Mbrojtjes së të Dhënave, i cili është autoriteti lider i Bashkimit Europian për privatësinë, tha se TikTok në pronësi të kompanisë Kineze ByteDance dështoi të mbronte të dhënat personale të përdoruesve Europianë disa prej të cilave janë aksesuar nga stafi në Kinë.
Si rezultat platforma e videove me metrazh të shkurtër nuk adresoi shqetësimet për qasjen e mundshme të të dhënave nga autoritetet Kineze.
TikTok tha se e kundërshton fuqishëm këtë vendim dhe se ka përdorur kornizën ligjore të vetë BE-së, konkretisht të ashtuquajturat klauzola standarde kontraktuale, për të ofruar akses të kufizuar dhe të kontrolluar në distancë. Ajo planifikon ta apelojë vendimin.
Gjithashtu tha se ky vendim nuk merr plotësisht parasysh masat e sigurisë së të dhënave që janë zbatuar që në vitin 2023, të cilat monitorojnë në mënyrë të pavarur aksesin në distancë dhe sigurojnë që të dhënat e përdoruesve të BE-së të ruhen në qendra të dedikuara të të dhënave në Evropë dhe Shtetet e Bashkuara.
TikTok, e cila është rritur me shpejtësi ndër të rinjtë në mbarë botën vitet e fundit dhe ka 175 milionë përdorues në të gjithë Evropën, shtoi se nuk ka marrë asnjëherë ndonjë kërkesë për të dhëna të përdoruesve nga autoritetet kineze dhe nuk u ka dhënë kurrë të dhëna atyre.
“Ky vendim rrezikon të vendosë një precedent me pasoja të gjera për kompanitë dhe të gjithë industritë në Evropë që operojnë në shkallë globale,” tha TikTok në një deklaratë. /PCWorld Albanian
