Shenjat në trup të shkaktuara nga torturat çnjerëzore të policisë serbe, për Fehmi Ramoca Ademin, sado që janë të dhimbshme, janë edhe krenare për faktin që nuk u është nënshtruar pushtetit jugosllav.
Gjithçka nisi në vitin 1981, ku si i ri mori pjesë në protestat e asaj kohe, duke u maltretuar nga policia serbe.
Tri vjet pas, në njërën nga pikat e derivateve në hyrje të Podujevës, theu fotografinë e ish-presidentit jugosllav, Josip Bronz Tito, në sy të qindra të rinjve serbë që gjendeshin në autobusin e linjës Nish-Prishtinë.
Ky veprim, çoi në arrestimin e tij, me një pompozitet të madh nga regjimi i asaj kohe.
Mbajtja fillimisht në burgun e Prishtinës dhe më pas në Beograd, ishte shumë e rëndë për të.
Aty u keqtrajtua fizikisht. Madje, edhe me metoda çnjerëzore.
Thotë se si sot i kujtohet porosia që ia dha në dhomën e përbashkët në burgun e Prishtinës, njëri nga figurat kryesore të çështjes kombëtare, heroi Afrim Zhitia.
Bindjen e njëjtë kundër Jugosllavisë dhe ish-presidentit të saj, Josip Bronz Tito, e ka edhe sot.
Për të secili person që mendon se Tito ka qenë i mirë për shqiptarët është tradhtar.
Bile shkon edhe më tej.
Kronika e realizuar nga Arton Rama
