Fundori amerikan, Larry Thomas nuk është më pjesë e skuadrës së Trepçës që bën gara në Superligën e Kosovës në basketboll.
Ekipi nga Mitrovica, të hënën ka zyrtarizuar largimin e Thomasit, i cili ishte pjesë e Trepçës prej fillimit të këtij sezoni.
Në fakt, Trepça ka thënë se me marrëveshje trepalëshe është vendosur që Thomas ta vazhdoj karrierën jashtë Kosovës, saktësisht në Izrael te skuadra Ironi Ashkelon.
Me marrveshje trepalëshe në mes të klubeve KB TREPÇA dhe A.S IRONI ASHKELON edhe vet lojtarit ju informojmë që Larry Thomas karrierën do të vazhdoj në Izrael”, ka shkruar Trepça, që ka falënderuar Thomasin për kontributin, si dhe i ka dëshiruar suksese në vazhdim të karrierës.
Thomas ka fituar Superkupën e Kosovës me Trepçën, ndërsa më herët ishte shpallur kampion edhe me skuadrën e Pejës.
Këtë sezon, Thomas ka luajtur me një mesatare prej 10 pikëve, 3 kërcimeve dhe 3 asistimeve për ndeshje.
