Të enjten, Serbia përmes një thirrje publike iu është drejtuar të gjithë të rinjve serbë.
Sipas Ministrisë së Mbrojtjes në Serbi, ata të cilët duan të bëhen shërbyesë profesionistë të ushtrisë serbe do të mund ta bëjnë këtë në procedurë të përshpejtuar.
“Ftojmë të gjithë të rinjtë dhe të rejat e interesuara që do të jenë nga 19 deri në 30 vjeç në vitin 2024, dhe që nuk kanë kryer më parë shërbimin ushtarak me armë, të aplikojnë për shërbimin vullnetar ushtarak, si dhe për trajnimin ushtarak për oficerë rezervë. Kjo tregon patriotizëm ndaj Serbisë”, është thënë në njoftimin e tyre.
E në këtë situatë, njohësi i çështjeve politike, Visar Xani thekson se me strategji politike Serbia po përçon mesazh.
“Veprime të tilla janë tipike kërcënime, shantazh ndaj faktorit ndërkombëtar për faktin se pretendohet që të arrihen qëllimet politike përmes këtyre tensioneve dhe shfrytëzimit të krizave të ndryshme në botë të cilat po i shohim në Rusi apo edhe Izrael….. patjetër që Kosova duhet të ketë çasje të matur, konkrete karshi kësaj situate, por gjithsesi duhet të kemi parasysh se këtu e kemi NATO-n dhe është përgjegjës kryesor për siguri të kufijve dhe sigurisë në Kosovë”, deklaroi Xani.
Ndërkohë, njohësi i çështjeve të sigurisë, Drizan Shala thekson se me këtë hap të Serbisë, të targetuara janë Kosova dhe Bosnjë Hercegovina.
“Është e qartë se Serbia është duke planifikuar eksparcionin e saj në territorin e ish Jugosllavisë, përkatësisht në Ballkanin Perëndimor. Target të saj sipas të gjitha gjasave do të jenë Bosnje Hercegovina dhe Kosova. Mbi këtë bazë ne duhet të jemi të përgaditur dhe të marrim masa në bashkëpunim me faktorin ndërkombëtar dhe partnerët tanë gjeostrategjik që në rast se do të kemi një tenttivë për të bërë një disbalancë në aspektin e sigurisë të jemi të përgatitur”, bëri të ditur Shala.
Thirrja e Serbisë për rekrutë të rinj në ushtrinë e tyre vjen pas reagimit nga Departamenti Amerikan i Shtetit për deklaratat e presidentit ukrainas Volodymyr Zelensky se Rusia mund të tentojë të nxisë konflikte në rajonin e Ballkanit Perëndimor.
