Klubet e disa sporteve në Prishtinë janë bërë bashkë dhe e kanë themeluar Asociacionin e Klubeve Sportive Prishtina.
Nismë kjo e finalizuar me sukses dhe që përfshinë klubet e meshkujve dhe të femrave nga sporti i basketbollit, volejbollit, hendbollit dhe futsallit.
Unioni i klubeve do të marrë emrin “Klubet Sportive Prishtina”, me synim përmirësimin e organizimit të klubeve të kryeqytetit.
Kryetar i këtij asociacioni është Blerand Stavileci, i cili po ashtu është edhe kryetar i KB Prishtinës.
Ai tha se ndër qëllimet e këtij bashkimi edhe sigurimi i mëtejm i sponsorëve.
“Të gjithë e kemi një qëllim, e qëllimi është fitorja. Prishtina si kryeqytet i ka 133 tituj së bashku dhe arsyeja kryesore krahas bashkëpunimit është edhe sponzorizimi. Ne e kemi dizajnuar një logo dhe ajo do të jetë pjesë integrale e të gjitha ekipeve sportive, në krye me një plis që përfaqëson tifozërinë ‘Plisat’”, tha Stavileci.
I pranishëm në këtë mbledhje ishte edhe Kryetari i Prishtinës, Përparim Rama, i cili premtoi më shumë përkrahje për klubet e kryeqytetit.
“Kam qenë optimist por kulmi i saj është kur i kam takuar në zyre organizatorët dhe fokusi ka qenë gjithpërfshirës. Kur bashkohemi e kemi forcën më të madhe drejtë suksesit. Mundësia për joshje të sponzorëve është më e madhe dhe mundëson që fëmijët të ndërlidhen me sportin. Si kryetar komune jam prapa jush dhe do të më keni gjithmonë”, tha Rama.
Basketbolli, hendbolli, futsalli, volejbolli do të jenë pjesë e këtij unioni.
Basketbolli do të përfaqësohet me dy klubet, KB Prishtinën (M) dhe KB Prishtinën (F).
Hendbolli gjithashtu do të jetë në dy gjinitë, KH Prishtina (M) dhe KH Prishtina (F).
Njëjtë do të jetë edhe volejbolli, sport që përfaqësohet nga dy klubet KV Prishtina (M) dhe KV Prishtina (F).
Derisa futsalli do të përfaqësohet me klubit emblemë të kryeqytetit FC Prishtina Futsall.
