Thaçi për emisionin “Ditari” tregoi se tanimë njëri nga kandidatët veçse ka parashtruar një ankesë lidhur me shkeljet procedurale gjatë këtij procesi.
“Tanimë kemi një ankesë të cilën e ka parashtruar njëri nga kandidatët, ai ka kontestuar të gjithë procesin e përzgjedhjes së kryeprokurorit të ri të shtetit. Gjatë këtij procesi, ka pasur reagime edhe nga partnerët e Kosovës ndërkombëtar, siç janë: Shefi i Zyrës së Bashkimit Evropian, ambasadori i SHBA-së, ambasadori gjerman. Pra, këta janë partnerët tanë që na kanë përkrahur në vazhdimësi në fuqizimin e sundimit të ligjit. Mirëpo janë shprehur të zhgënjyer me vendimin i cili është marrë në mënyrë unanime nga të gjithë anëtarët e Këshillit Prokurorial”, tha Thaqi në Tëvë1.
Mirëpo, nga Thaqi nuk mungoi shpresa se presidentja e Kosovës, Vjosa Osmani, do të marrë një vendim të drejtë, e që sipas tij, vendimi më i drejtë do jetë anulimi i këtij procesi.
Gjithashtu, ai tregoi se disa nga shkeljet procedurale tanimë janë të evidentuara.
“Ne si shoqëri civile, presim që presidentja të marrë një vendim të drejtë, me qëllim që të garantojë integritetin e procesit të përzgjedhjes së kryeprokurorit të ri të shtetit, pra ajo duhet ta anulojë komplet procesin për shkak të këtyre shkeljeve procedurale, duke përfshirë këtu edhe shkeljet e tjera të cilat janë evidentuar”, shtoi tutje Thaqi.
Këshilli Prokurorial i Kosovës (KPK) në mbledhjen e 214-të, me votim unanim ka caktuar prokurorin Besim Kelmendi, ushtrues detyre të Kryeprokurorit të Shtetit.
Teksa BE, SHBA, Gjermania e shoqëria civile në Kosovë janë shprehur të zhgënjyer me procesin e përzgjedhjes së Kryeprokurorit të Shtetit. Por Këshilli Prokurorial shprehet se procesi ishte legjitim.
