Deputeti i VV-së, Halil Thaçi duke folur për zhvillimet e fundit në KEK, i ka quajtur opozitën lobues të operatorëve privat.
Sipas Thaçit blloku A5 dikujt i ka shërbyer që të përfitojë qindra miliona euro që nga paslufta.
“Me kohë e për çdo ditë e më shumë, këta deputetë sot të opozitës po dalin të jenë asgjë tjetër vetëm lobues të operatorëve privat. Këta lobues të operatorëve privat kanë mbi një vit që po vazhdojnë të flasin për bllokun A5 të termocentralit Kosova A. Kanë filluar të flasin edhe kur ishte në prodhim, edhe kur hapej tenderi dhe kur dështonte ai. Edhe kur rihapej edhe kur fitohej nga një operator atje. Pra blloku A5 dikujt i ka shërbyer të përfitojë qindra miliona euro që nga paslufta e dikujt të bëjë politikë brenda e jashtë Kuvendit me të”, ka thënë Thaçi.
Sipas tij, Nagip Krasniqi ka arritur ta ndalë gjakderdhjen më të madhe financiare në Kosovë, teksa ka shtuar se është drejtori që ka deponuar më së shumti lëndë në prokurori.
“Kam qenë dhe jam i brengosur për sigurinë e një personi siç është drejtori i Ndërmarrjes KEK, person ky që ka arritur ta ndalë gjakderdhjen më të madhe financiare në Republikën e Kosovës. Ky person ka qëndruar në vijnë e parë të përballjes me ata që shtetin dhe asetet e tij i shohin si plaçkë lufte duke i përvetësuar për veten e tyre dhe familjarët e shokët e tyre që në përgjithësi janë të lidhura me ish-regjimin. Nëse ka një drejtor në KEK që në prokurori ka deponuar lëndë më së shumti është vet personi që gjindet sot prapa grilave. Për mua është mesazh i qartë nga Prokuroria e Shtetit, ai që e lufton zhvatjen dhe keqpërdorimin dhe e pengon mafinë energjetike, do të përfundojë në pranga”, ka shtuar Thaçi në debatin parlamentar, shkruan teve1.info.
Sipas tij arsyeja e dështimit të riparimit të bllokut A5 është menaxhmenti i TCA-së, i shtyer nga opozita.
“Se ka qenë sabotazhë klasike nga ana e menaxhmentit të TCA-së, riparimi i bllokut A5, e them me përgjegjësi. Njerëz këta të shtyer nga opozita, lobuesit e operatorëve privat. Që nga shtatori 2022 ky menaxhment i sofistikuar për sabotazh është kujdesur mirë që riparimi i Bllokut A5 të mbetet një projekt i dështuar përgjithmonë”, ka deklaruar tutje ai.