Shtimi i masave të sigurisë në komunikacion bëri që njësi të ndryshme të mblidhen në sallën e takimeve në Stacionin Policor në Ferizaj.
Njësia e Reagimit të Shpejtë por edhe ajo e trafikut, para se të dalin në terren po i marrin edhe instruksionet e fundit lidhur me këtë plan operativ.
Pasi përfundojnë takimin, zyrtarët policorë nisen për në zbatim të këtij urdhri.
Por, fillimisht po i testojnë se a i kanë të gatshme të gjitha pajisjet.
Kështu, edhe u nisën drejt lokacioneve të caktuara, ku filluan të ndalohen edhe veturat që shkaktonin kundërvajtje në trafik.
Menjëherë nisën edhe gjobat për këto shkelje.
Ndërkaq, nga specialët filluan të kontrolloheshin edhe disa persona të cilët dyshohet se mund të kenë diçka ilegale.
Kështu plani operativ vazhdoi gjatë natës të së mërkurës, e ekipet e Policisë ishin të shpërndarë në gjithë qytetin e Ferizajt.
Vetura inteligjente e Policisë që bën identifikimin e shkelësve përmes formës digjitale, po qarkullonte në qytet.
Kështu, u evidentua edhe një shkelës i cili po përdorte telefonin gjatë vozitjes.
Për këtë, zyrtari policor i shqiptoi edhe gjobën sipas ligjit në fuqi.
E lidhur me veprimet policore dhe statistikat tregoi togerja, Nerimane Hashani.
Aksione të tilla në Drejtorinë Rajonale të Ferizajt janë të shpeshta, por që javëve të fundit janë shtuar veprimet në terren me qëllim të ruajtjes së rendit dhe sigurisë publike.