Tetë doganierë dhe një polic janë arrestuar, pas aksionit të sotëm të Prokurorisë Speciale të Kosovës në veri të vendit.
Të arrestuarit dyshohet se kanë kryer veprat penale “Korrupsion, marrje ryshfeti dhe keqpërdorim i detyrës zyrtare”.
Kështu bëri të ditur për teve1.info zëdhënësi i Doganës, Adriatik Stavileci.
“Sot, është bërë arrestimi i personave. Tetë oficerë janë arrestuar nga ana e Hetuesisë së Doganave, derisa oficeri policor është arrestuar nga Inspektorati Policor i Kosovës. Dyshohen për keqpërdorim edhe ryshfet”, tha ai.
Ndërkohë, Prokuroria Speciale e Kosovës ka bërë të ditur se gjatë këtij aksioni janë grumbulluar prova që nëntë zyrtarët kanë qenë të përfshirë në veprat për të cilat dyshohet.
Gjatë këtij aksioni janë sekuestruar 20 plomba zyrtare të Doganës së Kosovës, 10 telefon së bashku me katër 4 Sim kartela, një pistoletë e kalibrit 9 mm me tre karikator dhe 9 fishek, me leje, si dhe 16 copë municion jo zyrtar.
Aksioni është konfirmuar edhe nga zëdhënësi i Prokurorisë Speciale të Kosovës, Ekrem Lutfiu.
“Ky aksion është duke u referuar me urdhër të Prokurorisë Speciale ku dyshohet për veprat penale korrupsion, marrje ryshfeti dhe keqpërdorim të detyrës zyrtare”, tha Lutfiu.
Aksioni i Prokurorisë është asistuar nga Policia e Kosovës. Lidhur me këtë, detaje ka dhënë zëvendësdrejtori rajonal i veriut të Kosovës, Veton Elshani.
“Ne i kemi asistuar doganës, katër lokacione janë bastisur”, deklaroi Elshani./teve1.info/
