Profesori i Medresesë “Alauddin” në Prishtinë, Muharrem Tërnava, e ka vlerësuar si pozitiv vendimin për riorganizimin e orarit mësimor gjatë muajit të Ramazanit në kryeqytet.
Sipas tij, shembulli i Prishtinës është një praktikë e mirë që mund të merret si model edhe nga komunat e tjera.
“Shembulli i Prishtinës është shumë i mirë dhe mund të merret si model edhe nga komunat e tjera. Çështja e orarit, siç e kuptova unë, nuk ka të bëjë me humbje të orëve apo me prishje të procesit mësimor. Është vetëm një modifikim i përkohshëm brenda muajit të Ramazanit, që u jep mundësi edhe stafit mësimor dhe nxënësve ta shijojnë Ramazanin në shtëpi”, ka deklaruar ai në emisionin “1 natë” në Tëvë1.
Ai ka kundërshtuar pretendimet se ky vendim cenon laicitetin e shtetit, duke i cilësuar ato si të paqëndrueshme.
“Argumenti i palës që e kundërshton, se cenon laicitetin e shtetit tonë, është i paqëndrueshëm. Nuk ka të bëjë asgjë me laicitetin, sepse edhe shteti ynë garanton lirinë e praktikimit të fesë”, u shpreh Tërnava.
Një ditë më parë u bë e ditur se mësimi në Prishtinë do të nisë në orën 07:30, ndërsa i gjithë procesi mësimor do të përfundojë më së largu deri në orën 17:00, në kuadër të riorganizimit të përkohshëm gjatë muajit të Ramazanit. /teve1.info/
